Öryggismál

Húsvörður starfar við leikskólann og sinnir öllu almennu viðhaldi innanhúss og á lóð leikskólans, yfirfer klemmuvarnir og eldvarnir í leikskólanum. Árlegt öryggiseftirlit er frá heilbrigðiseftirliti Norðurlands eystra og Eldvarnaeftirlitinu og er skýrslum skilað eftir hverja úttekt. Öll slökkvitæki eru tekin í gegn og yfirfarin ár hvert af eftirlitsmanni. Stjórnstöð brunavarna við leikskólann er yfirfarin árlega. Samningur er við Öryggismiðstöðina um firmavörn og þjófavarnarkerfi í leikskólann.

Rýmingaráætlun er í leikskólanum og er hún kynnt fyrir öllu starfsfólki. Húsvörður og skólastjórnendur standa fyrir brunaæfingu einu sinni til tvisvar á ári.
Áhættumat er endurskoðað ár hvert og er geymt á skrifstofu skólastjóra.
Rekstrarskoðun á lóð og leiktækjum leikskólans er gerð árlega og hefur húsvörður og leikskólastjóri umsjón með henni.
Starfsfólk leikskólans sækir námskeið í skyndihjálp á þriggja ára fresti. Í leikskólanum eru sjúkragögn til að bregðast við fyrstu hjálp og eru þau yfirfarin árlega og oftar ef þarf. Starfsfólkið fór síðast á námskeið árið 2018, næsta námskeið er áætlað 2021.
Verði slys á börnum í leikskólanum eru þau skráð á sérstök eyðublöð í Karellen og skráningar teknar saman í lok hvers árs. Ef alvarleg slys eiga sér stað ber að tilkynna þau til lögreglu og lögregluskýrsla gerð í framhaldinu. Lögregluskýrsla er varðveitt hjá lögreglu en skólastjórnandi fær afrit óski hann þess.
Verði slys á starfsfólki á vinnutíma sem hafa í för með sér fjarveru frá vinnu eru þau skráð á slysaskráningarblöð leikskólans og tilkynnt til Vinnueftirlitsins.